-
-
السلام عليكم ورحمة الله وبركاته
**** البوست الخامس من سلسلة ازاى تكون مربى ناجح ****
اتكلمنا فى الاربع البوستات الى فاتوا عن الاستقبال والتحضين والالتهابات المعويه والكوكسيديا والكلوسترديا والاجراءات الى هنقوم بيها لغاية عمر 19 يوم وجهزنا المضاد الحيوى بتاع العمر 19_20_21_22 .
سامحونى انا بوستاتى بطريقه مرتجله ودا علشان المعلومه توصل فى ابسط صورها .
بالنسبه للمضاد الحيوى الى هنستخدمه فى العمر الكبير ده , قولنا اننا هنعمل اختبار حساسيه وننتقى افضل مضاد حيوى ايجابى للفرخ والمضاد الحيوى دا اكيد هيكون واسع الطيف بيؤثر على الغرامات السالبه والموجبه للبكتريا تنفسى ومعوى .
طيب يابشمهندس اخلط المضادات الحيويه مع بعضها ولا احط كل واحد لوحده ؟
الافضل انك تنزل المضاد الحيوى التنفسى لوحده والمعوي لوحده ودا علشان سرعة امتصاص الجسم للمضاد الحيوى وتجنبا لاقدر الله من ان يكون فى تضارب بين المضادات الحيويه ويؤدى لنتايج سلبيه وكمان الجسم يستفاد بكل مضاد حيوى على حده .
طيب هل انزل بالمضاد الحيوى دا تلت تيام ولا اربعه ؟
يفضل برده ان استخدام المضاد الحيوى ده يكون على اربع تيام , وممكن تعمل برنامج جميل جدا انك تقسم اليوم تلت اجزاء
- الجزء الاول مضاد حيوى تنفسى
- الجزء التانى مضاد حيوى معوى
- الجزء التالت فرى
يعنى ممكن تستخدم شوية فيتامينات شويه منشط مناعى, شوية غسيل كلوى, شويه احماض عضويه , شوية مضاد سموم, انتا ورحتك بقا وزى مانتا شايف بمعنى اصح خلى التمن ساعات الفرى دول عباره عن رفرش للفرخ وممكن كمان تستخدم مقشعات زى منتوفين او الميكس اويل الزيوت الطياره بتاعت موسعات الشعب دى جميله .
طيب هل هشوف مشاكل فى القطيع فى الوقت ده ؟
الطبيعى جداااا جداااا انك تشوف حالات تنفسيه من فرزات وكمان من بعض فراخ كبيره ودا بسبب ان الفتره دى بينشط فيها الامراض التنفسيه زى نشاط الميكوبلازما ومنها نشاط ال CRD فنصيحتى ليك خليك هادى جدا واستمر بوضع المضاد الحيوى بتاعك لغاية نهاية الكورس وكل ماكنت هادى كل ماكان تصرفك سليم اكتر ,وبقدر الامكان اعزل اى فرخ مصاب عن القطيع
طيب هنفرض لا قدر الله ان الطبيب البيطرى الى انا متابع معاه او المسؤل عن الاشراف البيطرى مقدرش يعملى برنامج قوى لصد الفيروسات وحصلتلى اصابه فيروسيه اعمل ايه ؟
اولا مهما كان الى نصحك بانك تحقن مضاد حيوى او تحط مضاد حيوى فى ماء الشرب اياك اياك اياك تسمع كلامه لان ببساطه مفيش مضاد حيوى تم اختراعه فى الدنيا بيقاوم فيروس دا غير انك لو حقنت هتعمل كارثه وهتنقل الفيروس من الفرخ المصاب الى الفرخ السليم ويبقا كل سنه وانتا طيب فى القطيع
طب عشان اطلع باقل الخساير اعمل ايه ؟
اولا:- تستخدم مطهرات الشرب فى الماء زى اليود _ الفيركون اس لمدة 6 ساعات يوميا
ثانيا :- رش حوائط العنبر والعمدان ان وجدت فقط وبعيدا عن الفراخ اربع مرات يوميا يعنى كل ست ساعات .
ثالثا :- هنستخدم موسعات شعب هوائيه مع مجموعة فيتامينات ومنشط مناعى جرعه 6 ساعات
رابعا :- هنستخدم مضادات السموم الفطريه والغسيل الكلوى ست ساعات
خامسا :- انا بفضل الجرعه الربعه ميه بيضه لمدة ست ساعات نريح فيها الفرخ شويه وان كان ولابد يبقا موسع شعب وفيتامينات ومنشط مناعى تانى
سادسا :- ابعد عن اى اجهاد يحصل للقطيع حاول توفرله الظروف الى تخليه يقاوم الفيروس وياخد كيرف النافق بتاعه ويمشى .
انا بفضل بعد نزول كيرف النافق ان يتم حقن القطيع ان امكن ولو مكنش متاح الحقن استخدم مضاد حيوى قوى تنفسى معوى عشان الامراض الثانويه الى هيسببها الفيروس , صدقنى باقى القطيع هيكون ممتاز وهتبيعوا كويس .
علشان ماطولش على حضراتكم , هنفرض ان شاء الله ان مفيش اصابه فيروسيه وتوقفت عند عمر 23 من عمر القطيع بعد ماخلصت كورس المضاد الحيوى , ابدأء على طول فى وضع كورس الكوكسيديا والكلوسترديا وفيتامين K3 ومانساش مضادات السموم والغسيل الكلوى لمدة تلت تيام متتاليه
ونتوقف عند عمر 26 يوم من عمر القطيع , وان شاء الله البوست الجى هيكون اخر بوست وهيكون مهم جدا جدا جدا وهنتكلم فيه ازاى نحقق وزن كويس عند البيع ,
السبت، 19 أكتوبر 2019
إرسال تعليق